Passport အသစ်လဲသည်။

ကျွန်မပတ်စပို့က သက်တမ်း (၆)လဘဲကျန်တော့တယ်။ ဒီကြားထဲခရီးသွားလာစရာရှိအခက်ခဲဖြစ်မှာစိုးတာ နဲ့ သက်တမ်းတိုးဖို့သံရုံးကိုရောက်သွားတယ်။  နိုင်ငံရပ်ခြားရောက်ပြီး ၄ နှစ်ကျော်ကာလမှာ သံရုံးရောက် တာ၊ စုစုပေါင်း (၂) ခါဘဲရှိသေးတယ်။  ရောက်ရောက်ခြင်းမှာ အခွန်ကိစ္စနဲ့ ဒီနိုင်ငံရောက်ကြောင်းသွားအသိပေး တာ။ နောက်တစ်ခေါက်တော့ X နဲ့ --/ သွားပီးမဲပေးတာလေ။ နောက်ပိုင်းတစ်နှစ်တစ်ခါအခွန်ဆောင်တိုင်း ရုံးက ကားဆရာကိုလွှတ်ပီးစာရေး၊ ပိုက်ဆံထည့်ပီးသွားဆောင်လိုက်တာဘဲ။  အရင်တစ်ခေါက်သက်တမ်းတိုးတော့ သူငယ်ချင်း KG ရှိတော့အရမ်းကိုအဆင်ပြေတယ်၊ သူဘဲ ဖောင်သွားယူလာပေး၊ ကျွန်မကဖြည့် ဆက်ပီးတော့ သူဘဲ အကုန်လိုက်လုပ်ပေးထားတော့ သွားစရာမလိုဘဲပြီးသွားတယ်။
ဒီတစ်ခေါက်လဲ သက်တမ်းတိုးဖို့ ဖောင်လူလွှတ်ယူခိုင်းတော့ ကိုယ်တိုင်လာခိုင်းတာနဲ့ သံရုံးကိုအရောက် လှမ်း ရပါတယ်။  သံရုံးရှိတဲ့ နေရာ ကျွန်မနေတဲ့နေရာနဲ့ဝေးတာကြောင့် မသွားချင်ဘူး၊ ကားတွေများ လူတွေထူထပ် တဲ့နေရာ ခေါင်းမူးတယ်။၊  မနက် (၆)နာရီထွက် ဟိုကို ၉ နာရီမှရောက်တယ်၊ သံရုံးမဖွင့်သေးတော့ အနားက KFC မှာသွားထိုင်စောင့်နေရတယ်။
သံရုံးရောက်တော့ အားလုံးလူအသစ်တွေ၊ မြန်မာတွေလဲသိပ်မရှိတော့ မတန်းစီရဘူး၊ ဒါပေမယ့် ကြာတယ်။
ရောက်ရောက်ချင်းမှာ အကျိုးကြောင်းရှင်းပြီးတော့ အကိုကြီးတစ်ယောက်က ပတ်စပို့ယူသွားတယ်၊ သက်တမ်းဘဲတိုးမလား၊ အသစ်ထုတ်ပေးမလားသွားမေးမယ်တဲ့။  နောက်တော့ ထွက်လာပီး အသစ်ထုတ်ပေး မယ်လို့ပြောတယ်။  လိုအပ်တဲ့စာရွက်စာတမ်းတွေကတော့
၁။ နောက်ဆုံးအခွန်ဆောင်ထားတဲ့ဖြတ်ပိုင်း
၂။ သံမှူးဆီခေါင်းစဉ်တပ်ပီးလက်ရေးနဲ့ရေးရတဲ့ နိုင်ငံကူးလက်မှတ်အသစ်ထုတ်ပေးရန်လျှောက်ထားတဲ့စာ
၃။ အလုပ်လုပ်နေတဲ့နေရာ ငွေကြေးဆိုင်ရာဌာနကရာထူးရှိသူတစ်ဦးရဲ့ လစာငွေဖော်ပြချက်နဲ့ လက်မှတ်
၎။ နိုင်ငံကူးလက်မှတ်အသစ်ရပြီးနောက် အဟောင်းကို ဘယ်အချိန်မှာပြန်အပ်ပါမယ်ဆိုတဲ့ကတိလက်မှတ်စာ
၅။ သံရုံးကထုတ်ပေးတဲ့ ဖောင်မှာ အပြည့်အစုံဖြည့်ပြီး (ဥပမာ ယောကျာ်း... မရှိ.. (မရသေးဘူး) အသက်၊ နေရပ်လိပ်စာ၊အလုပ်အကိုင် အကုန် မရှိပါ ၊ မရှိပါ၊ မရှိပါ အကွက်တိုင်းဖြည့်ရပါတယ်)
၆။ သတ်မှတ်ထားတဲ့ အတိုင်းတာနဲ့ နောက်ခံအဖြူ၊ ပတ်စပို့ပုံ က ၈၀%  မျက်ခုံး၊မျက်လုံး...အသားရောင်၊ စသည့်ဓာတ်ပုံရိုက်ဖို့အတွက် သတ်မှတ်ထားတဲ့စည်းကမ်း ၁၆ ချက်နဲ့ညီတဲ့ပုံတစ်ပုံ
၇။ ပတ်စပို့ပုံကို CD နဲ့ပါ တစ်ခါတည်းထည့်ပေးရပါတယ်။
၈။ နောက်ဆုံး (၃) လ လစာဝင်ငွေစာရင်း
ရုံးက လစာငွေကို အတိကျရေးတဲ့အတွက် ဂဏန်းတွေက အတိမဖြစ်နေရင် အခွန်ငွေအတွက် ၁၀ ရာခိုင်နှုန်း တွက်ရတာခက်လို့အတိကျ rounding amount ကိုရေးပေးရပါတယ်။
ပတ်စပို့အသစ်ရဖို့စိတ်လှုပ်ရှားနေတာထက်၊ သွားရတာဝေးတာရော၊ အလုပ်တွေပုံပီး မပြီးနိုင်ဖြစ်နေတာ ရော၊ အရမ်းကို စိတ်သောက ရောက်နေရတာနှစ်ပတ်ပါ။  အခွန်ဆောင်ဖို့လဲ စနစ်သစ်ဆိုတော့ ဘယ် လောက်များဖြစ်မလဲ၊  ဘာဖြစ်မလဲစိုးရိမ်တာလဲပါတယ်။  သံရုံးက ၀န်ထမ်းတွေကတော့ သေချာ ထိုင်ပြီး ရှင်းပြ ပါတယ်။ အဆင်ပြေအောင်လဲ သူတို့ကြိုးစားလုပ်ပေးရှာပါတယ်။  ကျွန်မက တစ်ခါမှ ကိုယ်တိုင် မလုပ် ဖူးတော့ ကြောင်တောင်တောင်နိုင်ပါတယ်၊ မြန်မာလက်ရေးကလဲ ကြောင်ခြစ်ဆိုတော့ ခဏခဏ ပြန်ပြန် ပြင်ရေးနေရတာ စိတ်ရှည်လက်ရှည်နဲ့ ဘယ်လိုရေး၊ ဘယ်လို လုပ်ဆိုပီးအကြံတွေပေးပါတယ်။

တစ်ခုဘဲ ခဏခဏ အလုပ်ဖျက်ပြီးသွားနေရတာသာကျွန်မအတွက် သောကပိုနေရတာပါ။
ဒီနေ့တော့ (၅) ကြိမ်မြောက် သွားအပြီးမှာ အားလုံးအစဉ်ပြေသွားတာမို့ လက်ဗွေနှိပ်၊ ဆိုင်းထိုးပီး  ဘဏ်မှာ ပိုက်ဆံသွားသွင်းရပါတယ်။  ဒီနေ့မှမိုးက အငြိုးကြီးနဲ့ရွာတော့ ကျွန်မကြွက်စုတ်ဖြစ်လာခဲ့တယ်။
passport အသစ်က (၃) နှစ်သက်တမ်းပါပါတယ်။ ဘဏ်မှာ အသစ်အတွက် $ 100 သွင်းရတယ်၊ အခွန်ငွေကတော့ ဒီနိုင်ငံရဲ့ငွေကြေးနဲ့ဆောင်ရပါတယ်။
အားလုံးပြီးသွားတော့ Deposit slip လေးပြပီး သံရုံးက ဖြတ်ပိုင်းသတ်သတ်ထပ်ထုတ်ပေးပါတယ်။  စာအုပ် အသစ်လေးရော။ နီနီရဲရဲ အရောင်တောက်တောက်လေးနဲ့  ပိုအဆင့်မြင့်လာတယ်ထင်ရတဲ့ စာအုပ်ကို ခဏခဏ ဖွင့်ကြည့်လို့မ၀တော့ဘူး။  ပင်ပန်းတာတွေတောင် သက်သာသွားသလိုခံစားရတယ်။  ခေါင်းကတော့ ကိုက်တုံးဘဲ။  ပြန်ရောက်တော့ နှုန်းခွေနေပီ။
Good for travel to all countries.. စာမျက်နှာအကြိုက်ဆုံးဘဲ (without visa) လေးပါပါလာရင် ပိုပီးတော့ ကြိုက်ဦးမှာ.. :P....

ပုံတင်ထားတာ.. အထက်မှချစ်သူ့အမိန့်အရ ဖြုတ်လိုက်ရပါကြောင်း...