မာမီ နှင့် ကျွန်မ

ကျွန်မအမေနဲ့ရင်းရင်းနှီးနှီးနေလေ့မရှိဘူး။  ငယ်ငယ်ကတည်းကအကျင့်ဖြစ်နေတော့။
ကျွန်မဆေးရုံတက်နေတဲ့အချိန်တွေ၊ နေမကောင်းဖြစ်တဲ့အချိန်တွေတော့ မာမီ့ကိုပိုသတိရတယ်။
ကျွန်မခံစားနေရတာတွေသူကြည့်ပီး အမြဲငိုနေလေ့ရှိတယ်။  တစ်ခါတစ်လေ ပါးပါးကိုပြောတတ်သေးတယ်၊ ဗိုက်ထဲပြန်သွင်းထားလို့ရရင် သွင်းထားချင်ပါတယ်တဲ့။း)

အဲဒါမောင်လေးနဲ့ညီမလေးက ဒီလောက်အကောင်ကြီးကြီး ရှည်ရှည်ကိုဘယ်လိုပြန်ခွေခေါက်သွင်းမလဲလို့ ပြန်ပြောလေ့ရှိတယ်။
မာမီက သူနာပြုဆရာမတော့မဟုတ်ဘူး၊ ဒါပေမယ့် ဆေးအကြောင်း အကုန်နားလည်တယ်။ တစ်ခုခုဖြစ်ရင် သူ့ကိုမေးပီးဆေးသောက်ရုံဘဲ။
သူဘယ်အချိန်မှာစက်ချုပ်သင်ခဲ့လဲကျွန်မမသိဘူး၊ ဒါပေမယ့် ကျွန်မတို့အခုချိန်ထိအ၀တ်စား သူချုပ်ပေးနေ တုန်းဘဲ။ 
ရွာမှာမွေးပီး မြို့မှာကြီးပေမယ့် စိုက်ပျိုးရေး၊ မွေးမြူရေးအရမ်းဝါသနာပါတယ်။  အိမ်မှာဆို ပန်းပင်၊ သစ်ခွပင်၊ သီးပင်စားပင်တွေနဲ့ ဘဲ/ကြက်တွေအများကြီးဘဲ။ ခွေးလေးတွေလဲပါတယ်။
ညီမလေးကတော့ မာမီနဲ့နဲနဲဆင်တူတယ်၊ ကျွန်မကတော့ ပန်းတွေပွင့်ရင်လိုက်လိုက်ခြွေတတ်တယ်၊
ဖျက်ဆီးရေးသမားပေါ့၊
မာမီက ရွာမှာမွေးတော့ ဘယ်လဘယ်ရက်မွေးလဲသူမသိဘူး၊ ပါးပါးကတော့ ရွာမှာရေကြီးတဲ့လမွေးတယ် ဆိုပီးနောက်လေ့ရှိတယ်။
တရုတ်သွေးနွယ်တဲ့မာမီက အသားဖြူတယ်၊ ကျွန်မတို့မောင်နှမ (၃)ယောက်ကတော့ သူ့လောက်မဖြူဘူး။  
အသိမိတ်ဆွေတွေကတော့ သမီးနှစ်ယောက်အမေ့အလှကိုမမှီဘူးပြောနေတုန်းဘဲ၊ ခုထိဘဲ။
ကျွန်မ ကျောင်းပီး အလုပ်လုပ်တဲ့အချိန်ထိ တစ်ခါမှဈေးမသွားခိုင်းဖူးဘူး၊ လိုတဲ့အ၀တ်စားအသုံးဆောင် သူဘဲ ၀ယ်ပေးလေ့ရှိတယ်၊ ကျွန်မလဲတစ်ခါတစ်လေ လိုက်သွားတယ်၊ ဒါပေမယ့် အမေတွေရဲ့ထုံးစံ ဈေးစစ်တာတွေ တစ်ဆိုင်ဝင်တစ်ဆိုင်ထွက်ဆို ကျွန်မက ဆက်မလိုက်တော့ဘူး။
ချစ်သူက နောက်သလိုလိုနဲ့ မာမီ့ကို ပြောရမယ်၊ သမီးကိုလောကကြီးအကြောင်းဘာမှမသင်ပေးဘူးတဲ့လေ။ 
တစ်ကယ်တမ်းတော့လဲဟုတ်တယ်၊ လိုလေသေးမရှိအကုန်လုပ်ပေးတော့ ကျွန်မဘာဆိုဘာမှ မယ်မယ်ရရ မသိခဲ့သလို၊ စည်းကမ်းလဲတင်းကျပ်လွန်းတော့ သူငယ်ချင်းလဲမရှိခဲ့ပြန်ဘူး၊ သူငယ်ချင်းရှိတာလေးနဲနဲက တော့ သူဆင်ဆာဖြတ်ထားတဲ့သူတွေပေါ့။ အဲဒီသူငယ်ချင်းတွေကိုအစ ကူးကူး ကို ဒီလိုပြော၊ အဲဒါစားတာ တွေ့ရင် မစားခိုင်းနဲ့၊ ဟိုမသွားခိုင်းနဲ့၊ မတဲ့ တဲ့အစာတွေစာရင်းက ဒီလို.. အဲဒါတွေယောင်လို့တောင် မကျွေး နဲ့၊ စသည်ဖြင့် အကုန်လိုက် ထိမ်းချုပ်တတ်ပါသေးတယ်။
ကျောင်းတုန်းက ကျွန်မဆီရောက်တဲ့ သူငယ်ချင်းတွေကစာဆိုလဲ သူကအရင်ဖောက်ဖတ်ပီးသား၊ ပီးမှ ကော် လေးနဲ့ပြန်ကပ်ပီးကျွန်မကိုပေးတတ်တယ်၊ အဲတုန်းကတော့ အရမ်းကိုစိတ်ဆိုးခဲ့တယ်၊ စကားမပြောဘူး၊
ပီးတော့ သူငယ်ချင်းတွေအဖွဲ့လိုက် အပြင်သွားကြတယ်၊ Picnic ထွက်ကြပီဆိုလဲ မလိုက်ခိုင်းဘူး၊
ကျွန်မကတော့ ဘာမှမတတ်နိုင်တော့အစာငတ်ခံဆန္ဒပြပါတယ်၊  အိပ်ရာထဲခွေအိပ်နေပီး ဘာမှမစားဘူး၊   ၁ရက် ၂ရက်ဆိုရင်တော့ မာမီကပြန်လာချော့ပါတယ်၊ အဲဒါလဲမစားပါဘူး၊ နောက်တော့ ဗိုက်အရမ်းစာတော့ မှ ထစားပါတယ်၊ ပီးရင်စကားမပြောဘူး၊ တစ်ပတ်နီးပါဘဲ...
ကျောင်းတုန်းက အဆောင်မှာနေတော့ အခန်းထဲက အိပ်ရာကအစ၊ အ၀တ်စားတွေ အသုံးဆောင်တွေ ကျောင်းမဖွင့်ခင်အကုန်လာပြင်ဆင်သွားပေးတယ်၊ ကျောင်းပိတ်လို့ပြန်ခါနီးဆို အဆောင်လိုက်လာပီး အကုန် သိမ်းဆည်း လိုတာထုပ်ပိုးပြင်ဆင်ပေးပီး အိမ်ပြန်ခေါ်သွားတယ်၊ သူငယ်ချင်းတွေက ကျွန်မကို အားကျတယ်၊  သူတို့လဲအဲလိုအမေမျိုးလိုချင်သတဲ့။ ကျွန်မကတော့ ကိုယ့်စိတ်ကြိုက်လုပ်ခွင့်မရတော့ စိတ်ထဲမှာအင်တင် တင်ရယ်၊  အဲဒီနောက်ပိုင်းတော့ အကျင့်လိုလိုဖြစ်လာပီး မာမီမရှိရင် ကျွန်မဘာမှမလုပ်တတ်တော့ဘူး။
အဆောင်မှာနေတုန်း သူများတွေချက်တာတွေလိုက်ကြည့်ပီး ဒီနွေအိမ်ပြန်ရင်တော့ အိမ်မှာ ချက်အုန်းမှ ဆိုပီး တေးထားပေမယ့် အိမ်ရောက်လဲမီးဖိုချောင်ပေးမ၀င်ပြန်တော့ နောက်ဆုံးထုံးစံအတိုင်း မာမီဟင်းချက်နေတာ ဘေးကဘဲထိုင်ကြည့်ရင်း အချိန်ကုန်ပြန်တယ်..  မီးဖိုချောင်ကိစ္စဆို ကျွန်မကိုခိုင်းတာတော့ ပဲပင်ပေါက် အမြစ်ချွေတာ၊  ဒါတောင်ပါးပါးက အေ၇ှ့က ကာဆီးကာဆီးလုပ်သေးတယ်..  သူကလဲကျွန်မကိုခိုင်းရင် မကြိုက်ဘူး။ စောင်ခေါက်တာတောင်မှ လေးတဲ့စောင်အထူကြီးတွေဆို မခေါက်ခိုင်းဘူး။
မောင်လေးနဲ့ညီမလေးကတော့ သူတို့လွပ်လပ်သင့်သလောက် လွပ်လပ်ခဲ့ဖူးတယ်၊ အိမ်ကစ္စတွေလဲ တတ်သင့်သလောက်လုပ်ခဲ့ဖူးတယ်၊  ကျွန်မကတော့ သိပေမယ့် ဘာမှမလုပ်ခဲ့ရဘူး၊  အလိုလိုနေရင်းအိမ်မှာ အငယ်ဆုံးလိုဖြစ်နေခဲ့တာ... အခုထိပါဘဲ။
တစ်ယောက်တည်းနေတဲ့အခါတော့ အစုံပလုံချက်ပြုပ်တော့တာဘဲ.. ဒါပေမယ့် အဆင်မပြေပါဘူး၊ ၁ နှစ်ကျော် ကျော်လောက်မှ အကျင့်သားဖြစ်လာတာ.. အိမ်မှာ ကလားကာ တပ်တာကအစ၊ အိမ်တွင်းအပြင် ဆင်တွေ ကမောက်ကမဖြစ်နေတာ...  ညီမလေးလာလည်တုန်းက.. မာမီက ဖုန်းဆက်ပီး နင့်အမ အိကျီတွေ ဘယ်လိုစီထည့်ထားပေး၊ ဘယ်ဟာက ဘယ်နေရာ၊ မီးဖိုချောင်သုံးပစ္စည်းစီတာကအစ သူက လှမ်းခိုင်းနေပါ သေးတယ်။
ကိုယ်တိုင်မလုပ်ခဲ့ရပေမယ့် မာမီ ကအိမ်ထောင်ရှင်မ ပီသ လွန်လွန်းးး လို့.. ကျွန်မလဲ အတုမြင်အတတ်သင် အကုန်လိုက်လုပ်နေတာဘဲ... 
ငယ်ငယ်ကနေအခုထိ မိဘစကားမလွန်ဆန်ရဲခဲ့ပေမယ့် ချစ်သူရတော့ ချစ်လွန်းတော့လဲ ရည်းစားခိုးထား ရဲတဲ့သတ္တိရှိနေပြန်တယ်.. 
ကျွန်မဒီလ အိမ်အရမ်းပြန်ချင်တယ်.. ဘာကြောင့်မှန်းမသိ၊ ဖုန်းဆက်ရင်လဲ သမီးဖုန်းဖိုးအရမ်းကုန်မယ်ဆို ပီး စကားအမြန်လုပြောနေတဲ့ မာမီ့ကိုတွေးရင်း စိတ်မကောင်းလဲဖြစ်မိတယ်..
ကျွန်မဆီကနေဖုန်းဆက်ရင်တစ်ကယ်လဲအရမ်းကုန်ပါတယ်၊ (၅) မိနစ်လောက်ရင် ၅၀ လောက်သွားပီ။
မောင်လေးကတော့ gtalk သုံးဖို့သင်ထားပေးတာဘဲ.. ကို TZA ဘလော့က သူ့မာမီ gtalk သုံးနည်း မှတ်စု စာအုပ်လေးတွေ့တော့ မာမီ့ကိုပိုသတိရသွားတယ်။ 

အမေများနေ့မှာ သားသမီးတွေ မရိုးနိုင်တဲ့ပုံစံအမျိုးမျိုးချစ်ပြတဲ့၊ ဂရုစိုက်ပြတဲ့မိခင်တွေအားလုံး ကျမ်းမာ ကြပါစေ။