တွဲထားသောလက်များ


တစ်ရက်ကျွန်မ သိမ်ကြီးဈေး MCC ကနေပြန်အလာ ပလက်ဖောင်းတစ်လျှောက်တစ်ယောက်တည်းပျင်းရိရိနဲ့ လမ်းလျှောက်နေတဲ့အချိန်၊ ကျွန်မနဲ့ အရှေ့မလှမ်းမကမ်းမှာ ချစ်သူ (သို့) လင်မယား နှစ်ယောက် တစ်ယောက်လက်တစ်ဖက်၊ လေးတယ်လို့ထင်ရတဲ့အထုတ်တွေကိုဆွဲလို့၊ ရန်ကုန်နွေနေပူပူအောက်မှာ လမ်းလျှောက်နေကြတယ်။ ကျွန်မစိတ်ထင်တော့ သိမ်ကြီးဈေးကနေပြန်ရောင်းဖို့ပစည်းတွေဝယ်လာတာဖြစ်မယ်လို့ တွေးထင်လိုက်တယ်။ ပုံစံကြည့်ရတာတော့နွမ်းနွမ်းပါးပါးပါဘဲ။ မိန်းကလေးသယ်တဲ့အထုတ်က ယောက်ျားသည်တဲ့အထုတ်ထက်ပိုသေပြီးပေါ့ပုံရပေမယ့် သူကမိန်းကလေးပေကိုး လေးတော့တော်တော်လေးမယ်။ ကျွန်မဆတ်တောက်တောက်နဲ့ ကျော်တက်သွားမလို့အတွေးဝင်ပေမယ့်.. တစ်ဖြည်းဖြည်းချင်းဘဲ သူတို့နောက်ကလျှောက်ပြီး ကြည့်နေမိတယ်။ ရည်ရွယ်ချက်ကတော့တိတိကျကျမရှိပါဘူး။ လမ်းလျှောက်နေရင်းအပျင်းပြေဆိုပြီးကြည့်နေလိုက်တာ။ ဒီလိုနဲ့ မီးပွိုင့် လမ်းကူးပြီး ဘုရားကျောင်းနားကိုကျော်သွားတဲ့အခါ.. ရုတ်တရက် ယောက်ျားဖြစ်သူက ဘာစိတ်ကူးပေါက်လဲမသိဘူး။ မိန်းမဆီကအထုတ်ကို လှမ်းယူပြီး သူ့အထုတ်နဲ့ ပေါင်းပြီးဆွဲလိုက်တယ်။ ကျန်လက်တစ်ဖက်က မိန်းကလေးရဲ့လက်ကိုကိုင်ပြီး ပြုံးရွှင်ပေါ့ပါးစွာနဲ့ ဆက်လျှောက်သွားကြတယ်။ကျွန်မတောင်သူတို့နောက် မြန်မြန်ဆက်မလျှောက်နိုင်ဘဲကျန်ခဲ့တယ်။

အဲဒီအချိန်မှာ ကျွန်မအတွေးတစ်ခုဝင်လာတယ်။

တစ်ဦးတစ်ယောက်က ကျန်တစ်ဦးရဲ့ လက်ကိုတွဲလိုက်တဲ့ အခါမှရရှိလာတဲ့ခွန်အား..ကိုယ်ခန္တာအရတော့ အားရချင်မှရမယ်။ လူဆိုတာစိတ်ဆောင်ရင်ကိုယ်ပါတာမို့..စိတ်ခွန်အားတော့ရမှာသေချာတယ်။ ဒါကို လက်တွဲထားသူနှစ်ဦးသာသိလိမ့်မယ်။

ငယ်စဉ်ကလေးအရွယ်တုန်းက အဖေ၊ အမေကို အားကိုးပြီးတွဲထားတဲ့လက်။ ကြီးလာတော့ ခင်မင်တဲ့သူငယ်ချင်းတွေယုံကြည်မှုနဲ့ တွဲထားကြတဲ့လက်။

ချစ်သူတွေရလာပြန်တော့လဲ ချစ်မြတ်နိုးတဲ့စိတ်နဲ့ မလွှတ်တမ်းတွဲထားတဲ့လက်။

အကြင်လင်မယားဖြစ်တော့လဲ တစ်ဦးပေါ်တစ်ဦး နားလည်ကြင်နာမှုနဲ့ တွဲထားတဲ့လက်။

အသက်ရွယ်ကြီးရင့်လာတော့လဲ တစ်ယောက်ပေါ်တစ်ယောက် မှီခိုပြီးတွဲထားတဲ့လက်။

အဲဒီတွဲလက်တွေထဲမှာ စွမ်းအင်တွေအများကြီးပါဝင်နေတယ်ဆိုတာကို တွေးကြည့်မိတယ်။

နေမကောင်း၊ မကျမ်းမာဖြစ်နေတဲ့သူတွေကို အစားအသောက်တွေသွားပေးပြီး အားပေးစကားတွေပြောတာထက်၊ သူ့လက်ကို ကြင်နာစွာဆုပ်ကိုင်အားပေးရင် အဲဒီခွန်အားက အနှိုင်းမဲ့ပါဘဲ။

အရာတစ်ခုခုမှာ ကျဆုံးအားငယ်နေတဲ့သူကို သူ့လက်ကိုကိုင်ပြီး အားပေးလိုက်တဲ့အချိန်မှာ သူ့ရဲ့စိတ်ထဲမှာ အင်အားတွေအလိုလိုဝင်လာနိုင်သလို၊

ချစ်ခင်တဲ့မိသားစု၊ မောင်နှမ၊ ဆွေမျိုးများကိုလဲ ခွဲခွာရတော့မယ့်အချိန်၊ ပြန်တွေ့တဲ့အချိန်မှာ ဆုတ်ကိုင်လိုက်တဲ့လက်တွေမှာ ခွန်အားတွေရှိတယ်ဆိုတာငြင်းလို့မရနိုင်ပါဘူး။

ဒီနေ့ဘဲ သင်ချစ်တဲ့သူငယ်ချင်း၊ မောင်နှမ၊ မိဘ၊ ချစ်သူရဲ့ လက်ကို ဆွဲကိုင်ပြီး အဲဒီစွမ်းအားကို ခံစားကြည့်လိုက်ပါ။

မယုံနိုင်လောက်တဲ့စွမ်းအင်တစ်ခုကို တစ်ဖြည်းဖြည်းနဲ့ခံစားနားလည်ပြီး တွဲထားတဲ့လက်တွေဟာ အဓိပယ်ရှိတယ်ဆိုတာယုံကြည်လာပါလိမ့်မယ်။

Share:
spacer

No comments:

Post a Comment

ကူးကူးရေ...